ബോളിവുഡില്‍ ലഹരി ഉപയോഗിക്കുന്ന ആളുകളുടെ പേരുവിവരങ്ങള്‍ പുറത്തു വിട്ട് അറസ്റ്റിലായ നടി റിയ ചക്രബോര്‍ത്തി. ബോളിവുഡിലെ യുവനടിമാരായ സാറ അലിഖാന്‍, രാകുല്‍ പ്രീത് സിംഗ് എന്നിവര്‍ സ്ഥിരമായി ലഹരി ഉപയോഗിക്കുന്നവരാണെന്ന് റിയ വെളിപ്പെടുത്തിയതായാണ് വിവരം.
ഇവര്‍ക്കും വനിതാ ഫാഷന്‍ ഡിസൈനര്‍ സിമോന്‍ ഖംബാട്ട, സംവിധായകന്‍ മുകേഷ് ഛാംബ്ര, അന്തരിച്ച നടന്‍ സുശാന്ത് സിങ്ങിന്റെ മുന്‍ മാനേജര്‍ രോഹിണി അയ്യര്‍ എന്നിങ്ങനെ റിയ പരാമര്‍ശിച്ച മറ്റുള്ളവര്‍ക്കും നര്‍കോട്ടിക്‌സ് കണ്‍ട്രോള്‍ ബ്യൂറോ (എന്‍സിബി) സമന്‍സ് അയച്ചേക്കും.
ബോളിവുഡ് താരങ്ങളില്‍ ഭൂരിഭാഗം ആളുകളും ലഹരിമരുന്ന് ഉപയോഗിക്കുന്നവരാണെന്ന് റിയ പറഞ്ഞതിന്റെ അടിസ്ഥാനത്തില്‍ ഇരുപത്തഞ്ചോളം പേരെ എന്‍സിബി നിരീക്ഷിക്കുന്നുണ്ട്. ഇവരില്‍ പലരെയും വൈകാതെ ചോദ്യം ചെയ്തേക്കുമെന്നാണ് സൂചന.
മുംബൈയിലും ഗോവയിലും ഏഴിടങ്ങളില്‍ ഇന്നലെ എന്‍സിബി റെയ്ഡ് നടത്തി. മുംബൈ ബാന്ദ്രയില്‍ നിന്ന് ഒരാളെ അറസ്റ്റ് ചെയ്തു. ഇതോടെ റിയ ഉള്‍പ്പെടെ ലഹരിക്കേസില്‍ അറസ്റ്റിലായവര്‍ 11 ആയി. ബൈക്കുളയിലെ ജയിലില്‍ റിയയെ ഒറ്റയ്ക്കാണ് പാര്‍പ്പിച്ചിരിക്കുന്നത്. സുശാന്തിന്റെ ആരാധകര്‍ നടിയെ ആക്രമിക്കാന്‍ സാധ്യതയുണ്ടെന്ന മുന്നറിയിപ്പിനെത്തുടര്‍ന്നാണിത്.
റിയ വെളിപ്പെടുത്തിയ പേരുകളില്‍ പ്രമുഖയായ സാറ അലിഖാന്റെ അരങ്ങേറ്റ ചിത്രം കേദാര്‍നാഥില്‍ സുശാന്ത് സിംഗായിരുന്നു നായകന്‍
സുശാന്തിന്റെ തായ്ലാന്‍ഡ് യാത്രയില്‍ സാറയും ഒപ്പമുണ്ടായിരുന്നു എന്നാണ് റിയയുടെ വെളിപ്പെടുത്തല്‍. ഇരുവരും തമ്മില്‍ അടുപ്പത്തിലായിരുന്നു എന്നും അഭ്യൂഹങ്ങളുണ്ട്.
രാകുല്‍പ്രീത് സിംഗ്,ഫാഷന്‍ ഡിസൈനര്‍ സിമോന്‍ ഖംബാട്ട, നടി കങ്കണ റണൗത്ത് തുടങ്ങിയവരെയും ചോദ്യം ചെയ്യുമെന്നാണ് സൂചന. കങ്കണയുടെ ലഹരി ഉപയോഗത്തെപ്പറ്റി 2016ല്‍ നടത്തിയ ഒരു അഭിമുഖത്തില്‍ കാമുകന്‍ അധ്യായന്‍ സുമന്‍ നടത്തിയ വെളിപ്പെടുത്തലിന്റെ അടിസ്ഥാനത്തിലാണ് നടിയ്‌ക്കെതിരേ ഇപ്പോള്‍ കേസുള്ളത്. അധ്യായന്‍ സുമന്റെ മൊഴിയും രേഖപ്പെടുത്തും.
